تـعــرف هـتـقـــول عـن إبـنـــك إيــــه ؟؟؟؟

هل فكرت مرة لما تروح تخطب لإبنك هتقول عنه إيه؟؟؟ ولا الحكاية دية ما خطرتش فى بالك؟؟!!كل الى إنت عاوزه وتتمناه إنك تروح تقعد مع أهل العروسة وتقول لهم..أنا طالب ايد بنتكم لابنى فلان وهو شاب كويس وعنده شغلانة بتأكله الشهد وكمان عنده شقة واحتمال كبير يشترى سيارة-عربية يعني- ومرتبه هيزيد..وبعدين احنا هنجيب العفش اللازم للجواز.ودى حاجات مش هقلل من اهميتها لكن تشوفوا ان ده كل شئ؟ او ده هو اهم شئ ؟ المشكلة احنا مش عارفين حاجات كتيرة عن اولادنا اللى اتجوزنا امهاتهم برغبتنا وفرحنا لما خلفناهم وكنا سعداء كل ما كبروا . و لما جاءت المناسبة اللى المفروض نتكلم عنهم ما بنلاقيش حاجة مميزة نقولها ولو فكرت شوية هتلاقى كل اللى ممكن نقوله معلومات سطحية جدا لا تزيد عما يعرفه زملاؤهم فى الشغل او جيرانهم لكن ايه الشئ اللى يوصف قدرات ابناءنا وسماتهم الشخصية ونفسياتهم وطريقة تعاملهم والقيم اللى يؤمنوا بها ويتبنوها ؟ تارة نلاقى نفسنا مش عارفين وتارة اخرى مش واخدين بالنا ايه اللى نقوله؟ والموقف اللى انا رايح اخطب فيه لابنى هو الى يؤكد لى انى مش عارف عن ابنى حاجات كتيرة ومهمة!!

ابنى اللى عاش معايا من يوم ميلاده ليوم رحت اخطب له مش عارف اتكلم عنه واقول ايه والاقى نفسى باتكلم عنه زى اى حد تانى والمشكلة دى حاصلة لان احنا مش بنفكر نعد اولادنا للحياة بطريقة واضحة فتلاقينا بنقول اى كلام و كل همنا اكلهم ولبسهم وحصولهم على الشهادة وده مش غلط..بس مش هو كل شئ ولا اهم شئ.

نسينا ازاى لما يكبروا يكونوا اسوياء نفسيا والقيم واضحة عندهم وازى ما يتخلوش عن مبدأ ونسينا نربيهم ازاى يكونوا فاهمين الحياة وازاى يتعاملوا مع الناس ويحترموهم.

لكن لما راح ابو طالب يخطب السيدة خديجة من ابن عمها ورقة بن نوفل لسيدنا محمد ابن اخيه (صلى الله عليه وسلم) تعرفوا قال ايه عن ابن اخيه ؟ قال يصف ابن اخيه..

"ان محمد لو يوازن به فتى من قريش الا رجحه بشرفه وفضله واخلاقه وان كان فى المال فقل فإن المال ظل زائل وعارية مسترجعة "

ايه رايكم ؟ ده رجل فاهم ابنه ويعرف ان كل اللى بيقوله عنه صحيح . واختار الكلام اللى يخلى العلاقة الزوجية تستمر وتنجح . ركز على القيم والمبادئ ووضعها فى مكانها والمال فى مكانه مش زينا بنقلب الموازين ومش عارفين نقول ايه عن اولادنا لان بعضنا مش بيعرف يقول عن نفسه حاجة واضحة . طيب لو انت بعد عشرين سنة من الان هتروح تخطب لابنك تقدر تقول من الآن لحد يومها هتقول عنه ايه واللى انت هتقوله عشان يبقى حقيقة هتحققه فى ابنك ازاى ؟
انا فكرت مرة وكنت مسافر مع ابنى وقلت له انت الان عندك 15 سنة وان شاء الله هنخطب لك بعد 10 سنوات من الان يلا نفكر سوا ايه اللى تحب تقوله ونقوله عنك فى اليوم ده وتعالى نشوف هنحققه ازاى وقعدنا شوفنا كل اللى يحب نقوله عنه فى هذا اليوم اللى انتم عارفين كل شاب بيحلم به وقعدنا نفكر فى كل النواحى و قلنا ايه القيم والمبادئ اللى يؤمن بيها والوضع المهنى المناسب وبدأنا نتفق هنعمل ايه وازاى هنتعاون فى تحقيقه وبكده ممكن ابقى عارف كل شئ حقيقى عن ابنى وفى نفس الوقت هو يبقى عارف هو عاوز ايه ومحدد طريقه وازاى هنحققه.

لكن لما يبقى ابنى اللى عاش معايا خمسة وعشرين سنة مش عارف أقول عنه ايه يوم ما أروح اخطب له..دى تبقى مشكلة كبيرة لكن شفتم ابو طالب عارف يتكلم عن إبن أخيه إزاي!!

ياسلام لو كنا كده