لماذا انشأت هذه المدونة..

دايما أشوف حاجات كتيرة لما أقرأ، لما أسافر لما أتعامل مع زوجتى واولادى،مع اخواتى مع جيرانى او لما أركب مواصلة عامة او خاصة و كمان لما أروح مصلحة حكومية ولما أكون فى العمل مع زملائى..وأشوف ردود افعال الناس قد إيه بتكون عجيبة لا تخضع او تتبع منطق واضح لما يضحكوا او حتى لما يبكوا، لما يفرحوا مع بعض او لما يزعلوا من بعض وساعتها بألاقينى بكلم نفسى واقول لو كلنا لما نبكى او لما نضحك يكون السبب جوهرى واصيل كنا ممكن نكتر فرحنا وفى مواقف كتيرة ما نبكيش ولا نغضب من بعض واحيانا نبكى بدل ما نضحك . وبعدين قلت فى نفسى بطل فلسفة وسيب كل واحد فى حاله اللى يبكى يبكي واللى يضحك يضحك انت مش هتنظم الكون على رأى أمى الله يرحمها لكن فكرت وقلت ليه لأ ؟ ما يمكن بدل ما انظم الكون احاول انظم نفسى من خلال ما اطرحه على الناس ربما اضبط نفسى بما اقوله وربما يضبطونى من كلامى لما يقرأوه فقلت اعمل مدونة واقول فيها اللى انا شايفة من وجهة نظرى واللى يمكن يضبط الامور شوية واللى ممكن يريح الناس من بعض الالام اللى ممنهاش فايدة وبدون فلسفة تعالوا نبدأ مع بعض بحاجة بسيطة خالص .
رحت ازور عمتى امبارح قالت لى انها زعلانة من واحدة قريبتها جدا علشان ما زارتش امها الله يرحمها اللى ماتت من سنة وهى عيانة قبل ما تموت قلت لها "تزعلى ليه هى لو زارتها كانت اخدت الثواب لان اللى يزور مريض يكون مسته رحمة الله واللى يجلس شوية عنده يكون انغمس فى رحمة الله،انت ممكن تقولى انا زعلانة عليها وهنا فيه فرق كبير فى مشاعرك تجاهها وبالنسبة لك كمان تكون اعصابك هادية وتوفريها لحاجة تكون تستاهل الزعل"

قالت و الله عندك حق.

شفتم الموضوع بسيط ازاى

يــا ســـــلام لـو كــنــــــــا كـــــده